Ցավով հայտնում ենք, որ 66 տարեկանում վախճանվել է Լեզվի պետական տեսչության նախկին պետ, բանասիրական գիտությունների դոկտոր, պրոֆեսոր Սերգո Երիցյանը։
Սերգո Երիցյանը ծնվել է 1957 թվականի հունիսի 11-ին Հայկական ԽՍՀ Ալավերդու (ներկայիս՝ Թումանյան) շրջանի Ճոճկան գյուղում։
1975-1978 թթ․ սովորել է Երևանի պետական համալսարանի բանասիրական ֆակուլտետում, ապա կրթությունը շարունակել է Մոսկվայի Լոմոնոսովի անվան պետական համալսարանի ժուռնալիստիկայի ֆակուլտետում։
1987 թվականին պաշտպանել է «Հայաստանի հեռուստատեսությունը ԶԼՄ-ների համակարգում» թեմայով թեկնածուական ատենախոսություն և ստացել բանասիրական գիտությունների թեկնածուի գիտական աստիճան։ 2004 թվականին ստացել է բանասիրական գիտությունների դոկտորի գիտական աստիճան՝ պաշտպանելով «Հեռուստատեսություն. գործառույթները, զարգացման միտումները և հեռանկարները» թեմայով ատենախոսություն։
1981-1984 թթ. հեռուստառադիոպետկոմում աշխատել է որպես խմբագիր։
1987-1999 թթ. Հայաստանի հեռուստատեսության և ռադիոյի համակարգում եղել է մեկնաբան, բաժնի վարիչ, «Հասարակական կարծիքի ուսումնասիրման կենտրոն» ՊՓԲԸ գործադիր տնօրեն։ 1992 թ․ հեղինակել և երկար տարիներ վարել է հանրային հեռուստատեսությամբ եթեր հեռարձակվող «Կարծիք» հաղորդաշարը։
1995-2003 թթ․ եղել է ՀՀ Ազգային ժողովի պատգամավոր։
2003-2006 թթ․ եղել է ՀՀ կրթության և գիտության նախարար։
2006-2008 թթ․ եղել է ՀՀ նախագահի խորհրդական։
2010-2018 թթ․ ղեկավարել է ՀՀ ԿԳՆ լեզվի պետական տեսչությունը (ներկայիս Լեզվի կոմիտեն)։
Ս․ Երիցյանը եղել է «Լոռվա ձոր» հայրենակցական միության նախագահը։ Երկար տարիներ դասավանդել է Երևանի պետական, Հայ-ռուսական, Խ․ Աբովյանի անվան պետական մանկավարժական համալսարաններում։ Նա տարաբնույթ հոդվածների, մենագրությունների, մասնագիտական 45 գրքի հեղինակ և համահեղինակ է։
Սերգո Երիցյանը ամուսնացած էր, ուներ դուստր և որդի։
Լեզվի կոմիտեն ցավակցում է Սերգո Երիցյանի հարազատներին, բարեկամներին ու ընկերներին։